Ásgeir Björnsson

Já, ég fattaði að það er dáldið síðan síðustu myndir komu og er það eiginlega vegna þess að ég hef ekki verið nógu duglegur við að taka þær og heldur ekki nógu duglegur að skoða allt, en meina, það er nógur tími eftir!

Lindau – litli bærinn (3000 manns á eyju sem tekur 10-15 mínútur að labba endilanga) með góða veðrið síðasta laugardag
Ítalskur matur -Var svona alþjóðadagur í síðustu viku þar sem við fengum að smakka ýmislegt frá öllum heimshornum. Ítalinn í bekknum mínum var veik, svo hún kom með smá fyrir okkur í þessari viku og smakkaðist bara mjög vel.

Þegar maður fer í lengri ferðir að heiman þá gleymir maður að sjálfsögðu alltaf einhverju. Ég hef hingað til ekki fundið neitt sem mig vantaði sérstaklega, nema kanski mömmu, en hún gat víst ekki komið með í þetta skiptið. En í dag fattaði ég hverju ég gleymdi heima á klakanum. STUTTBUXUM OG SÓLARVÖRN! Já, ég skrapp í túristaferð til Lindau, lítill bær við Bodensee vatnið syðst í Þýskalandi. Þar sér maður alveg yfir til Austurríkis og Sviss hinu megin við vatnið. Það var svo æðislega gott veður að ég bara setti upp derhúfuna og var á stuttermabolnum að kafna úr hita. Reyndar voru skólafélagarnir (sem af einhverjum undarlegum ástæðum eru að stórum hluta frá há-hitalöndum (Brasilíu, Mexíkó, Kólumbíu, Túnis, Grikklandi og Kamerún t.d.)) flestir í peysum og jafnvel sumir í úlpum utanyfir og leið bara þokkalega. Kennarinn var svo að segja í gær að spáin fyrir morgundaginn væri 16°C og sól. Ég skal reyna að hugsa um ykkur heima í rigningunni og sullinu á meðan ég ligg léttklæddur að lesa í bók með ís í hinni í Englisher Garten

Hey, ef einhverjum var ekki búið að detta það í hug þá er ég hörmulegur dansari. Allavegana var ég dreginn á einhvern Suður-Amerískann stað í gærkvöldi og þessar mjaðmahreyfingar eru bara ekki eitthvað fyrir stirðann Íslendinginn, kanski ég reyni bara að kenna þeim gömlu dansana?

Það er miklu meira af táknmáls-tölurum hérna en heima. Þeir svona ferðast í hópum bara. Til dæmis var áðan að koma inn stór hópur af svona fólki hérna inná hótel og það er alveghreint magnað að sjá stórann hóp af fólki og heyrist ekki múkk í þeim

Ég held ég sé farinn að gleyma íslenskunni aðeins. Allavegana þegar ég er að skrifa á msn er ég farinn að sletta aðeins á þýsku. Dáldið leiðinlegt fyrir þá sem ekki hana skilja, því þá þarf ég alltaf að útskýra..

Ps. Gott ráð til að gera afgreiðslufólk pirrað: Ég fór á McDonalds um daginn og átti að borga 4,90 Evrur og rétti konunni 50 evru seðil og svo 90 sent í endalausri smámynt Svipurinn á henni var mjög grimmur þegar hún sá þetta en ég hló bara að henni

Mér, Ásgeiri Björnssyni, tókst að þvo fötin mín í þvottavél án nokkurrar líkamlegrar aðstoðar. Eina sem ég þurfti var að ég spurði konuna í afgreiðslunni hvernig þetta virkaði, fór síðan niðrí þvottahús og skoðaði og las leiðbeiningarnar einu sinni, prófaði líka hvernig það virkaði að kaupa þvottaefni. Eftir það fór ég upp í herbergi og skoðaði öll skítugu fötin, hvað mátti þvo á hvaða hita og svoleiðis. Fór síðan í tölvuna og googlaði þvottamerkin sem ég skildi ekki. Átti síðan langt og gott símtal við mömmu um hvernig væri best að gera þetta og skipulagði tvo þvottapakka, annann á 30° og hinn á 40°. Fór síðan með þvottinn niðrí þvottahús og las leiðbeiningarnar með vélinni á ensku og þýsku 1-2 sinnum og svo lét ég bara vaða

Núna er risastór þvottasnúra þvert yfir herbergið mitt. Það er eins gott ég hreyfi mig ekki mikið í nótt því hún liggur einmitt beint yfir rúminu mínu, en ég passaði að hafa litlu fötin yfir rúminu svo þetta danglaði ekkert voðalega mikið í andlitið á mér.

Svo þetta tókst mér, karlmanninum sjálfum Núna vil ég fá klapp á bakið, þ.e. bara svona elektrónískt klapp á bakið, því þið eruð nú ekki alveg með svo langar hendur að ná hingað til mín.

En að öðru. Í gær fór ég á C-B-R. Ég man ekki alveg hvað þetta heitir á íslensku, en þetta heitir Erlebnismesse á þýsku og Messe þýðist fair á ensku. Þetta var svona endalaust mikið af kynningarbásum frá um 1500 mismunandi fyrirtækjum að kynna ýmislegt sem varðar útivist. Var samt ekkert svo allt of mikið af svona minni tegund af útivist, en það var ýmislegt áhugavert þarna. Til dæmis sá ég pínulítinn Fiat með svona tjald á þakinu sem var fest við toppgrindina, alveg hreint magnað og ég þarf eiginlega að fá mér svoleiðis á Yarisinn.